今晚西甲前列大战，巴塞隆拿主场硬撼基达菲。巴塞近期内部问题多多，尤其係苏亚雷斯因伤长抖，爆发中锋荒影响攻击力；基达菲初段最叻玩拉布，造访鲁营唔会轻举妄动，半场和更值博。（Now 632及611周六晚11时直播）

巴塞踏入2020年都未好过，先有主帅华尔维迪因失落西超盃被炒，再到体育总监兼名宿艾比度批评个别球员表现，连向来内敛嘅美斯都被辣着公开反击，甚至爆出球王想离队嘅传闻，虽然事件迅速摆平，但似係面和心不和。

除此之外，新帅史坦恩接手后7仗，取得5胜2负睇落唔差，不过其中4仗险胜1粒，并于西盃被毕尔包踢出局。史帅重拾传控打法却埋门效率偏低，凸显箭头苏亚雷斯受伤后把握力欠佳问题，可惜整个1月冬季转会窗都买唔到个似样啲嘅中锋，近日轮到天价水货奥士文尼迪比利重创提早收咧，令巴塞启动西甲特例，若有球员季中养伤至少5个月，就算冬窗已过，仍可于15日内签入西甲内或自由身球员代替。不过传闻中嘅目标包括罗伦摩朗、韦利安荷西，仲有今仗对手基达菲32岁前锋安祖路尔斯，似乎唔多够班，要极速融入巴塞体系亦有难度。

基达菲拉布斗磨
另一边厢，基达菲赢吓一场赢吓又一场，依家杀上第3位有机会踢下届欧联。儘管于西盃出局，但佢哋近13场正式赛事豪取10胜3负，有9仗保持清白身，其中8仗更半场同对手打和，证明呢班波唔单止守得，初段会玩拉布斗磨，今仗造访劲旅巴塞，当然会先求稳阵，2.4倍半场和不容错过。