顶级超新星速度较量
周末德甲压轴戏，由5哥利华古逊主场挑战3哥多蒙特，主队为冲前4，客军望后上争霸，和波对双方嚟讲都係失败，两军同样拥有唔只1位炙手可热嘅顶级年轻攻击手，近期交锋亦铺铺大交易，今晚势演对攻好戏，中位数3.5球大盘咪走宝！（Now 670、FOX+、有线651及611台周日凌晨1时30分直播）

利华中前场艾兰古斯养伤，指挥官迪米亚巴尔停赛，但中前场仍然有超多具分量攻击手，20岁嘅夏维斯天才横溢，歇冬后3场联赛已经交出两个入波同1次助攻，啱啱德国盃亦连环食诈胡；巴黎圣日耳门来投嘅飞翼穆沙戴亚比近期愈战愈勇，速度、技术同把握能力兼备，已成为利华反击头号尖刀；加埋前线仲有比拿拉比、禾兰、里安拜尼同艾拿利奥等不同类型前锋，教练保斯可以因应唔同对手作出调配。利华近期喺联赛同德国盃表现都唔抢眼，主因係对手实力较次频频泊大巴，令佢哋嘅锋将冇空位施展高速，今仗遇上有前冇后嘅多蒙特就啱晒嘴形，佢哋歇冬前就曾经作客凭反击赢过拜仁，今晚随时可以再施奇袭。

近4交锋总入球最少4个
多蒙特队长马高列奥斯喺德国盃受伤要抖4周，防中汤马士迪兰尼亦未好番，但中前场依然兵力过剩，艾宁夏兰特同查顿辛祖呢对19岁孖宝製造入球能力夸张到癫，祖利安白兰特不断为前线提供优质输送，近期仲有17岁新星基奥云尼雷拿崛起，佢喺德国盃对云达不来梅就凭个人技术射入世界波，今晚由佢代替原本状态一般嘅列奥斯，多蒙特前场嘅火力随时有增冇减。不过佢哋防线一直不停犯错，教练法夫尔打算起用新援安利简恩客串右中坚，取代频频派胶嘅文路尔艾简治，但位置未惯状态亦成疑，未必可以顶得住利华快攻。两军近4次碰头总入球都有4球或以上，今场简单追大盘。