今晚阿King睇中意甲阿特兰大，佢哋啱啱仲喺意盃出局，今仗主场对包尾嘅史帕尔，誓要踢场翻身仗，就算让两球照捧让球主胜。(myTV Gold 301、now 638、有线654及614台周二凌晨3时45分直播)

阿特兰大上轮联赛因路尔斯梅利尔射失12码，只能赛和国米1比1，上周中喺意盃16强作客费伦天拿，更喺打多1人下输1比2被踢出局。不过艾真度高美斯、伊利锡该役只係后备入替，明显唔在乎意盃。阿特兰大之前2场主场联赛，合共豪赠AC米兰同帕尔马10蛋，相反包尾嘅史帕尔近6仗联赛输5场，造访阿特兰大听做炮灰。

至于法足盃32强，业馀球队圣派维喺中立场出战法甲劲旅摩纳哥，圣派维上圈爆大冷淘汰图卢兹，不能忽视，摩纳哥自新帅罗拔图摩兰奴上任后，踢法更加有前冇后，连续2仗恶斗巴黎圣日耳门，合共炮製11个士哥，今仗3.5球嘅大盘咪走鸡。（myTV Gold 302、now 639、有线655及615台周二凌晨3时55分直播）最后英冠西布朗主场对史笃城，适逢「2哥」列斯联今轮输波，榜首嘅西布朗赢波就可甩开4分，遇上近6场作客5败嘅史笃城实去尽，主胜必捧。