默郡打吡南野登场
周一凌晨英格兰足总盃第3圈话题之战，利物浦主场同爱华顿上演「默西赛德郡打吡」。「红军」今季喺晏菲路球场出击无人可挡，呢场对住由安察洛堤领军嘅死敌「拖肥」爱华顿，当然要用表现话畀「肥安」知：利物浦先係「默西赛德郡1哥」。近年交手利物浦主场出击都抢缰，呢场随时一开波就狂攻，半场主胜值得留意。

（myTV Gold 306周一凌晨零时01分直播）

意大利名帅安察洛堤执教爱华顿，令整个利物浦市足球生态产生变化，「拖肥糖」球迷希望以安察洛堤功力，推翻多年来屈居喺利物浦之下嘅形势，事实上，安帅上任后喺快车期获2胜1和，上场亦只係力战以1比2仅仅输畀强敌曼城，大有复甦味道。对家表现回勇，「红军」上下当然亦有目共睹，不过，利物浦今季持续勇态，联赛遥遥领先之馀，早前远征卡塔尔捧走世冠盃，欧联亦强势杀入16强，士气爆灯。

主场对爱华顿惯早领先
利物浦今季之所以成功，除咗穆罕默德沙拿、罗拔图法明奴同沙迪奥文尼继续有高水准发挥之外，连奥历治等后备兵都有货交，加上1月高调引入嘅日本中场南野拓实，呢场有望首次为「红军」披甲，绝对有足够兵源争夺本土盃赛，较早前英联盃因要参加世冠盃被迫起用年轻球员而出局，呢次英足盃肯定倍加努力。以往利物浦喺主场面对宿敌爱华顿甚少甩拖，近6次喺晏菲路踢打吡战，5次半场已取得领先优势，相信呢场会继续先下手为强，主动围攻爱华顿，推介半场主胜。