周五凌晨英冠焦点战，打比郡主场与班士利上演下游生死斗。上仗赢波嘅打比郡结束连续多场不胜嘅颓势，士气返晒嚟，呢场重量级球星朗尼加盟后有机会首次披甲，有助加强球队攻力，双方务求新年第一击做齣好戏，肯定主动抢攻，中位数2.5球入球大值博。（周五凌晨3时45分开赛）

早前连续7轮联赛不胜嘅打比郡，喺2019年最后一战主场面对查尔顿踢出争气波，虽然早早就因基斯甸比历红牌被逐打少个，好彩球队靠小将积逊礼特梅开二度，最终以2比1逆转取得久违胜仗，尽显球队斗志。打比郡新年第一击将有强援朗尼随时候命，呢位34岁前英格兰国脚离开美职华盛顿联重返英伦，加盟打比郡咁耐只能随队跟操，等到1月终于可以落场满足「波瘾」，相信有力增强打比郡战力。

班士利积分榜深陷降班区，为护级肯定要抢分，呢场焗住要攻。睇番往绩，两军近5次交手全开3球或以上，每次比赛场面都颇为开放，呢场双方都希望喺新年首战取得好成绩，踢法必然进取，入球骚走唔甩，一于捧中位数2.5球嘅入球大。

史云斯丧炸查尔顿
同时开波仲有场史云斯主场对查尔顿，联赛开局强势嘅史云斯，近期走势下滑，不过佢哋距离升班附加赛席位只差一点点，仲有大把机会慢慢追，头号射手安祖阿休近5仗上阵入5球，绝对係入波嘅保证。反观查尔顿近9场作客未赢过，但话晒新年第一战，就算攞唔足3分都要踢出气势，球队近8场作客7次开3球或以上，呢次造访史云斯必定再同对手斗攻，都係捧中位数2.5球嘅入球大。