今晚以盃赛做主打，最有心水嘅梗係比利时盃8强大战，安德列治主场硬撼布鲁日。安德列治今季坚飘忽，日前联赛激战后未回气，布鲁日表现更稳定，加上近年碰头食住对手，客胜有计。

（周五凌晨3时45分开赛）

安德列治暂时排喺比甲第10位，季初更因战绩欠佳，将回巢兼任教头嘅高柏尼贬番做球员，可惜作用唔大，战绩依然飘忽，各项赛事近5仗仅获1胜，日前联赛打吡战逼和标准列治1比1，仲因打少个耗力甚巨，相信未回得切气。

相比之下，布鲁日表现更稳定，开季18场比甲取得14胜，喺榜首带紧头，虽然欧联已经出局，但试过作客赛和皇马2比2，绝不失礼，造访安德列治唔会Hea踢，一定想赢波兼踢死敌出局。睇番双方近5次交手，布鲁日4胜1和未输过，摆明格食格，客胜有买趁早。

飞燕诺炒得起乙组仔
至于荷兰盃第2圈，甘堡尔主场迎战飞燕诺。甘堡尔只係乙组仔，而且啱啱新败，为专注争升班随时留力，飞燕诺今季喺荷甲战绩麻麻，梗係想喺盃赛发围，两队近6次碰头飞燕诺赢晒，今场让波都不妨直取让球客胜。（周五凌晨3时45分开赛）

最后葡萄牙盃16强赛事，法马利卡奥主场对马夫拉，法马利卡奥虽然喺联赛3连败，但今季升上葡超即位居前列，认真唔讲得笑，呢班波一向重攻轻守，近8仗有7次开3球或以上，对住甲组仔马夫拉一定狂攻，捧入球大更佳。

（周五凌晨4时30分开赛）