分组煞科 有你冇我
今夜欧联头场之一，兼E组尾轮关键大战，衞冕嘅利物浦作客火併萨尔斯堡。两军只差3分，利物浦若输波有出局之危，不能坐以待毙，萨尔斯堡为出线更加係非胜不可，以艾宁夏兰特、南野拓实为首嘅锋线必火力全开，遇上利物浦前线嘅「埃及文明」组合，摆明係斗攻格局，3.5球嘅入球大有买趁早。

（myTV Gold 303、Now 643、有线656及616台周三凌晨1时55分直播）

上届欧联盟主利物浦，依家喺E组以10分排榜首，领先拿玻里1分，萨尔斯堡则以7分排第3位，由于拿玻里今轮唔输即出线，因此很大机会出现红军同萨尔斯堡「两队只能活一队」局面。当然，利物浦今场和波亦可出线，但若果咁唔好彩输波，或者未能取得4比5或以上仅输1球嘅赛果，而拿玻里唔输的话就会出局，因此出线唔係想像中咁稳阵。

呢支英超「1哥」想玩保守保住优势？睇番佢哋今届5场欧联都未能保持清白之身，包括两斗弱旅亨克均有失球，防线不稳，加上洛夫云上仗伤出，焗用祖高美斯打中坚更牙烟，倒不如以攻代守，除咗沙迪奥文尼及罗拔图法明奴持续勇态外，王牌穆罕默德沙拿近期获得轮换休息，日前联赛大胜般尼茅夫3比0之役，佢入波兼交出靓助攻，状态明显回升。就连后备嘅奥历治及梳顿沙基利亦有货交，若果有乜依郁可随时候命。

夏兰特欧联场场入波
另一边厢，萨尔斯堡为出线今轮非胜不可，由于首循环作客利物浦仅输3比4，只要今场赢波，又或者係低于5比4嘅赢1球赛果，便肯定压过对手晋级，不过呢支奥地利班霸一向重攻轻守，挪威小将夏兰特今届欧联5场分组赛场场有士哥，南韩前锋黄喜灿及日本球星南野拓实亦屡建奇功，3人近5场欧联合共轰入13粒，连同欧联附在内，难怪萨尔斯堡近6场欧联5次开4球或以上，今场癫凤斗狂龙实多波入，3.5球嘅大盘不容错过。