星级少帅挑机班霸
周六晚德甲上演龙争虎斗，一哥慕逊加柏主场斗班霸拜仁慕尼黑，双方状态同样火热，两军赛前都扬言以赢波为目标，近4次碰头就合共炮製咗18个入球，今晚强锋火併相信会再演入球骚，黑柴推介中位数3.5球大盘。

（Now 670、FOX+、有线651及611台周六晚10时30分直播）

今仗慕逊加柏嘅普路士公园球场逾54,000张门票早早沽清，亦係两军顶级射手大对决，慕逊加柏嘅马古斯杜林同比列安保路近况弗爆，喺主场有条件挑战拜仁嘅射手王罗拔利云度夫斯基同新贵基拿比，不过慕逊加柏虽然係德甲主场王，但主场7战失10球却係德甲主场前7名失波最多球队，至于拜仁防线始终唔齐人，亦係德甲作客前4名失波最多嘅球队。

马高路斯领军一直赢
今仗係慕逊加柏嘅新教头马高路斯首度挑战拜仁，呢位43岁东德少帅已经注定係未来星级教练，佢2013年喺奥地利萨尔斯堡青年队展开执教生涯，两季前升格萨尔斯堡一队，到今季升格德甲慕逊加柏，过去3季分别攞晒奥地利青年联赛、同两届奥地利甲组联赛冠军，今季带领慕逊加柏亦雄踞德甲榜首，严格嚟讲近年係一直赢，佢崇尚进攻，战术灵活多变，而且注重细节，令慕逊加柏阵上表现既悦目又有成绩，今晚初遇拜仁佢话得赢波一个目标。

拜仁上轮主场1比2不敌利华古逊，但客军踢出近年最佳水准，翼锋里安拜尼同门将哈迪基亦踢出人生代表作，不过拜仁全场射门24次，包括3次中门框同多次临门失机，计表现同火力绝唔失礼，输波后压力更大，由于临时主帅汉斯弗利克深受球员爱戴，众将势必求胜力保教练饭碗，今晚作客同加柏斗攻，入波又点会少？