周五下午澳职上演下游大激斗，墨尔本胜利主场迎战珀斯光辉。胜利虽有托禾伦频频抢士哥，可惜后防唔争气拖累球队，光辉今季作客未输过，平手盘抵玩。

（MyTV Gold 302、Now 639、有线615及655台周五下午4时30分直播）

传统劲旅胜利继季初失落澳足盃之后，联赛表现持续沉沦，开咧7战仅取1胜2和4负，赛前只係领先垫底球队威灵顿凤凰1分，排喺积分榜尾2，近况衰到贴地。后防甩漏问题正正係胜利今季致命伤，佢哋至今已经失咗11球，係联赛防守表现最差嘅球队之一，就算瑞典前锋托禾伦近4仗都有波入都无补于事。

珀斯光辉往绩佔优
上季常规赛盟主珀斯光辉，虽然今季6场联赛只係赢过榜尾嘅威灵顿凤凰，不过计埋嗰场，光辉今季3场作客联赛未输过，比起主场成绩明显更出色，呢场仲有主力守将阿历斯格兰坐完波监复出，整体战力有所提升。再睇埋对赛往绩，两队最近4次联赛碰头，光辉赢咗3场，当中近2次作客都能够砌低对手，呢场有望喺今季主场未赢过嘅胜利身上抢到分，平手盘捧得过。