另一场B组赛事，热刺作客斗贝尔格莱德红星；热刺今季作客未赢过，而且今场仲有可能冇埋两大射手哈利卡尼及孙兴民，让唔起主场特醒嘅红星，红星让球主胜捧得过。

（myTV Gold 303、Now 643、有线616及656台周四凌晨4时直播）

上届欧联亚军热刺今季表现大跌Watt，除咗英超排名跌出前10名，联赛连盃赛踢咗8场作客只得5和3负，除咗英联盃斗英乙仔高车士打赛和0比0，其馀7场加埋失14球，包括首场分组赛作客奥林比亚高斯喺领先2球下被对手逼和2比2，而且热刺今场仲有可能冇埋两大射手哈利卡尼同孙兴民。哈利卡尼上场对爱华顿因病毒感染缺阵，要经过体测先知能否赶及上阵。

孙兴民则因为情绪不稳好大机会避战，事关孙兴民上场英超一次从后拦截，搞到爱华顿葡萄牙中场安祖高美斯断脚，据报孙兴民领红牌后返回更衣室后，一直失控狂喊，到球队离开葛迪逊公园球场，孙兴民依然抬唔起头失晒魂，望都冇望在场苦苦等候嘅南韩传媒就离开，而且全程不发一言兼冇开电话，唔想同任何人接触，返到伦敦即一支箭闪返屋企。热刺见势色不对已为佢提供心理治疗，不过由于心情未平复，今晚好大机会缺阵。稍为安慰係高美斯成功接受手术，今季虽提早收咧，但日后应可100%康复重返球场。

贝尔格莱德红星主场硬淨
贝尔格莱德红星上场作客热刺虽惨吞5蛋，不过佢哋上届3场主场分组赛先后打和拿玻里及击败利物浦，只係最后一轮例行公事输畀巴黎圣日耳门，主场威力唔可以睇小，依家佢哋排小组第3，只比热刺少1分，今场赢波就可升上第2位，抢得出线主动权，主场出击必定拚尽，受让捧得过。