难忍上届遭柏达邦双杀
周日晚德甲头场榜尾大战，尾二嘅科隆主场迎战包尾嘅柏达邦，科隆开季诸事不顺，虽然近期表现同斗志都有起色，但连仗遇强发唔到围，其实科隆人脚实力同经验都远胜柏达邦，今晚难得遇弱誓要打开今季主场胜利之门，科隆因为近绩同对赛往绩都差而只係小让半一，黑柴捧上盘。

（Now 670、FOX+、有线651及611台周日晚9时30分直播）

科隆前季不幸降班，好在两名国脚级领袖汉恩同祖拿斯赫达捱义气，放弃转会陪降，终于以超班姿态攞到上届德乙冠军，柏达邦就紧随其后齐齐升班，势估唔到依家两队又齐齐沦落榜尾，科隆上届顺风顺水，唯一唔顺嘅就係联赛畀实力次一皮嘅柏达邦双杀，不过今届两军差距拉进一步拉远，柏达邦因为财困冇钱买人仲要卖人，相反科隆积极扩军志不在小。

上仗和史浩克有番朝气
可惜嘅係，科隆升班后先出现伤兵潮影响开局，近期伤情改善又连仗遇强敌，上轮作客大勇嘅史浩克终于踢番争气波，国脚队长祖拿斯赫达喺补时为球队扳平，而且睇番全场形势佢哋不落下风，明显有番朝气，攞呢一分对士气帮助亦好大，今晚声言摆大头抢攻，博今季主场开斋。

柏达邦升班后场场搏尽，季初用闪击战术频频开赛初段偷鸡入波，教练史堤芬包姆加特已经谂尽办法，只可惜众将始终未够德甲水准，搏到依家都只得1分敬陪末席，即使已经踢咗7轮比赛，教练承认仲未试出最佳阵容，今晚会畀机会较少落场嘅球员，睇吓仲可唔可以试出彩虹，作客面对志切求胜嘅科隆几难偷鸡。