嚟紧国际赛期，各大联赛都要让路，今晚只得英锦标分组赛玩吓，但都难唔到阿King，其中最有心水嗰场南部B组赛事，牛津联主场对衞冕嘅朴茨茅夫。朴茅虽然联赛排名不及牛津联，但每逢出战英锦标表现特醒，撞正牛军伤兵满营，有力反客为主，客胜有计。

（周三凌晨2时45分开赛）

先讲讲两军喺南部B组形势，牛津联首轮以2比1反胜诺域治U21，朴茅更加係两战全胜排第1，佢哋同属英甲分子，牛津联位列第9，远高于中下游嘅朴茅，不过现时有占美汉臣、拿柏、佐治科奥尼、丹东尼科迪等养伤，阵容不整。另一边厢，朴茅近2仗联赛赢晒，总算走出早前3场不胜嘅低谷，何况该队乃上届英锦标盟主，出战呢项赛事分外落力，连同今届两连胜在内，朴茅近10场英锦标，于法定时间豪取9胜1和佳绩，非常认真冇hea踢，客胜值得捧场。

串叶士域治胜新特兰让球胜
至于同一时间开波嘅两场波，南部A组叶士域治主场对基宁咸，叶士域治前锋佐敦罗拔士及阿曼度杜巴喺联赛冇乜上阵机会，必趁英锦标争取表现，在首轮以2比1反胜热刺U21，正係阿曼度杜巴两番助攻畀佐敦罗拔士入波，加上近4次对基宁咸赢3次，主胜稳开。最后係北部A组新特兰主场对甘士比，英甲「6哥」新特兰有艾登麦基迪及米克麦纽迪伤愈复出，攻力进一步提升，相反乙组仔甘士比有前锋麦斯胡礼受伤上阵成疑，此消彼长下，今届喺英锦标首度亮相嘅「黑猫」可轻取对手，直取让球主胜。