火力有限炒唔起
周五凌晨欧霸分组赛拉开战幔，其中L组曼联将会主场出击斗艾斯坦拿。红魔近期进攻遇上阻滞，尤其前场欠缺稳定射手担大旗，况且艾斯坦拿近年频频出现喺欧战赛场，经验有番咁上下，绝对唔会畀曼联轻易取胜，睇好艾斯坦拿守住红魔攻势，中位数3.5球入球细係好路。

（myTV Gold 303、Now 643、有线616及656台周五凌晨3时直播）

名宿苏斯克查上季中途接手曼联教鞭，时间仓促未能真正贯彻自己执教理念，今季终于可以大展拳脚，除了英超要力争前4之外，肯定希望喺欧霸攞到好成绩，藉此稳固自己帅位。

「娃娃脸杀手」上任后重用一班年轻球员，丹尼尔占士同云比沙卡两位英伦小将亦因此成功上位，尤其前者被誉为「新杰斯」嘅威尔斯快翼，联赛频频用上佳表现报答主帅对佢嘅信任，可惜无论係丹尼尔占士，或者「福仔」拉舒福特，都唔係以高入球效率见称嘅球员，加上另一前锋安东尼马迪尔有伤上阵成疑，红魔进攻瓣数极为有限，要喺对手密集防守杀出一条血路难度甚高。

艾斯坦拿实而不华专打突击
哈萨克代表艾斯坦拿近年经常出现喺各大欧战赛场，过去4届都成功杀入欧霸分组赛，虽然牌面上同欧洲各路豪门有差距，不过已经累积唔少作战经验，实力不容忽视，呢场作客挑战强敌曼联，就算拎1分都已经有赚，先做好防务再伺机打突击反而仲划算。况且曼联近4仗全开3球或以下，进攻效率明显有待改善，两军呢场随时陷入僵持，宁愿捧中位数3.5球入球细。