出线冇阻力唔使急搏拳
美洲国家盃听朝上演B组首轮大战，阿根廷硬撼哥伦比亚。两军实力相差唔远，加上同组对手巴拉圭及卡塔尔威胁有限，如无意外两者应可携手晋级，首场比赛大家都唔想输，相信会踢得小心，波童推介中位数2.5球细盘。
（Now 650周日早上6时直播）
自从去年世盃16强出局，阿根廷曾经进入调整期，除王牌美斯暂别国家队，接替森柏奥利掌帅印嘅史卡朗尼亦试用唔少新人，可惜球队喺年初热身赛以1比3输畀弱旅委内瑞拉，表现未达预期，所以史帅今次重召阿古路、迪马利亚等旧将协助美斯，感觉重回旧路。阿根廷上场热身赛虽大胜尼加拉瓜5比1，不过对手太弱未能作准，预计首次领军出战大赛嘅史卡朗尼唔会太冒险，稳阵行先。
哥伦比亚喺上年世盃后亦出现人事变动，执教逾6年嘅阿根廷籍主帅柏加文离任，至今年初始聘用前伊朗教头奎罗斯接手。呢位葡萄牙籍主帅上任后领军4场获3胜1负，表现稳定。进攻灵魂占士洛迪古斯于刚过去球季喺拜仁长居后备，状态存疑，加上箭头法卡奥未复当年勇，今届随时要靠冇咩国际赛经验嘅阿特兰大前锋杜云沙柏达数胡，锋力自然差啲。
奎罗斯将防守理念注入哥军
奎罗斯以往执教伊朗都係靠防守起家，相信会将佢嘅防守意念带到哥伦比亚。由于同组其馀两支对手巴拉圭及卡塔尔实力差一皮，阿根廷及哥伦比亚只要发挥正常，好大机会携手晋级，今场和波对大家都冇坏，冇需要急于求胜打残自己，2.5球入球细有1.54倍值得热捧。