17亿争夺战 泰利林伯内讧
今晚喺「球坛圣殿」温布莱球场上演嘅英冠附加赛决赛，由阿士东维拉硬撼「绵羊」打比郡，称得上係「车仔同学会」。大家最熟嘅梗係维拉助教泰利，以及打比郡领队林柏特，同属车路士传奇球星，深受铁血防守影响，喺关乎价值1.7亿镑（约17亿港元）嘅冲超之战，一定稳字当头，况且近年英冠附决赛例少交收，2.5球嘅入球细要趁早买。（周一晚10时开赛，马会网上文字直播）
维拉助教泰利与打比郡主帅林柏特分属老友，以往係车仔称霸英超时期嘅正副队长兼核心，两人都係「寸王」主帅摩连奴嘅得意门生，深明铁血防守坚係重要，亦影响埋佢哋执教风格。由于係1场过分胜负嘅决赛，稍有闪失随时冇得升上英超，特别係维拉上年先喺英冠附加赛决赛输畀富咸，肯定体会甚深，今场唔想重蹈覆辙。查实维拉主帅甸史密夫都几注重防守，连埋英冠附4强在内，佢哋喺近6仗只失5球，当中4仗开2球或以下；至于打比郡喺「林伯」麾下近6仗失5粒，同样有4次开2球或以下，守得两嘴。
近6届决赛全开两球或以下
翻查纪录，近6届英冠附加赛决赛，法定时间内合共只入得5粒咁大把，全部开2球或以下。始终决赛关乎升班资格，一旦升上英超后，球会未来3年至少获约17亿港元收入，球员亦可以喺更高水平嘅英超比赛，踢得好甚至可博跳槽，若果今仗一时唔小心，则由只差一步变为一步之遥，为名为利，梗係唔敢轻举妄动，2.5球嘅细盘乃不二之选。