海湾者波特兰伐木者捱细界

听朝美职有场直播赛事，波特兰伐木者主场对西雅图海湾者，呢个戏码喺个几礼拜前于美联盃上演过，当时伐木者加时以3比1击败对手，呢场亦令到海湾者星级主将丹普西被罚停赛3场兼罚款，今场亦唔踢得，加埋马田斯因伤缺阵，海湾者攻力严重受削，细盘捧得过。
 
海湾者前锋丹普西喺美联盃对伐木者一战，因为不满球证出示红牌赶队友出场，突然狂性大发，抢走咗球证本记事簿兼撕烂，咁卤莽梗係畀球证赶离场啦，最惨係事后美职赛会即刻罚咗「丹爷」喺联赛停赛3场，今场冇得再战伐木者。
 
咪睇「丹爷」已经32岁，佢嘅战斗力仍然好强，喺联赛以7个入球同队友马田斯并列球队神射手，偏偏海湾者今场除咗「丹爷」停赛外，连另一尖刀马田斯都冇埋，佢咁跷又係喺美联盃对伐木者之战整伤腹股沟，结果要抖3至6个星期，今场亦唔使预佢。冇咗呢两大锋将，海湾者即刻唔识入波，近两场美职对住中下游球队费城联及圣荷西地震都输波兼零入球，认真湿滞。
 
伐木者刚大败止血为先
 
不过主场嘅伐木者亦唔好得几多，佢哋上场作客洛杉矶银河失惊无神输够5蛋，后衞列治维亦领红离场，今场坐波监。突然之间一场输咁多粒，梗係要做好防守止血先喇，一阵嚟多场大败仲得了？今场一队唔识入波，一队就避免失波，一于捧1.72倍细盘喇！