四新將悉數登場 曼聯國冠盃「加」冕

      國冠盃繼續陪大家過暑假，墨西哥球會CF阿美利加雖然經過兩場熱身，不過今戰對手曼聯牌面始終較強，加上紅魔4位新援已講明會落場考牌，故此買紅魔鬼「讓客」絕對有「利」。（周五7，有線61、64、201及203台周六早上11:05直播）

　　無可否認，CF阿美利加喺國冠盃已連撼洛杉磯銀河同埋聖荷西地震，並取得1勝1負成績，比賽狀態應該比曼聯好，不過佢地喺不足48小時前先同銀河交手，現匆匆再戰紅魔鬼，體力勢必輸蝕，加上前鋒奧利比柏拉達、中堅柏保路阿古拿、門將摩西斯蒙路斯，同埋新加盟中場查維亞古美斯全部被所屬國家隊徵召踢美洲金盃，暫未趕及歸隊，僅上任兩場新教練安比斯可以用人腳捉襟見肘，主勝唔使諗。

　　曼聯夏季買賣基本上塵埃落定，現時只差正選門將迪基亞去向有唔明朗，而另一門神域陀華迪斯冇隨隊赴美，未有列入今次國冠盃大軍名單，而最新消息係佢因拒踢二隊而激嬲雲高爾，睇呢位前巴塞門將勢必離隊。

　　域陀華迪斯冇得留低

　　但係紅魔鬼球迷唔需要太擔心，事關4位新援都分量十足，包括出擊力超強意大利右閘達美安、經驗豐富德國中場舒韋恩史迪加、荷蘭新星迪比，同埋一度引起列強爭奪法國國腳舒尼達連，曼聯官網更加指出，呢4位新援都會今仗亮相，實行要考牌取悅領隊雲高爾，故預期紅魔鬼出場陣容唔會太削，「讓客」有權擊落阿美利加個波盤齊贏。