曼城強勢祭“祖”

    歐冠盃分組賽明晨開戰，英超曼市雙雄齊齊出擊，重返歐冠賽場嘅曼聯作客荷甲班霸燕豪芬，“紅魔鬼”必打醒十二分精神，燕豪芬陣中球員雖然名氣不大，但都係年青當打小將，紅魔鬼未必可以穩操勝券，隨時有失分可能，初盤要讓平手／半球，唔值得捧場。

    反而曼城主場迎戰祖雲達斯勝算較高，雖然對手係上季亞軍，但曼城上仗完場前絕殺水晶宮，呢期有勢又有運，唯一可惜係大衛施華有傷唔踢得；不過，新加盟嘅迪布尼一樣咁有質素，加上核心杜尼狀態回勇，整體戰力依然強橫，誓必爭取歐冠首勝。

    祖雲達斯開季三場聯賽只得一和兩負，狀態令人質疑，好明顯派路、迪維斯及維達爾三大主力離隊，中前場受到一定影響，令到保羅普巴孤掌難鳴，新加入嘅文迪蘇傑暫時又未達到應有效果，始終都要適應意甲踢法，及與球隊磨合。講組織默契配合，一定唔及曼城，最主要係雙方近期表現都有好大差異，初盤曼城讓半球／一球，主場出擊嘅“藍月亮”料可光宗耀“祖”。

    推介：曼城2:0