皇馬回勇“拉”唔住

【本報消息】西甲馬德里雙雄分途出擊，皇家馬德里班拿貝主場迎戰馬拉加，乘歐冠贏波晉級氣勢，力爭聯賽重回勝軌一洗頹勢。馬德里體育會作客利雲特搶攻對手圖攬三分。
皇馬周中歐冠回勇，大炒對手重回勝軌兼殺入十六強，重振球隊士氣，今仗返回聯賽，為免被死敵巴塞羅那越甩越開，主場鬥馬拉加非勝不可。聯賽接連失分，皇馬現時已落後榜首巴塞十分之差，為爭取衛冕餘下賽事一分不能少，今仗主場鬥馬拉加，銀河艦隊肯定有人腳優勢。

皇馬鋒線牌面足
C朗今季歐冠威風八面，惜聯賽表現麻麻，上陣八場僅入過一球，幸賓森馬周中打破近六場的入球荒，配合伊斯高、阿辛些奧攻堅，皇馬鋒線牌面足。加上“大聖爺”巴利、高華錫等已全面復操，今仗隨時候命為皇馬增添火力。馬德里打吡爆鼻骨的隊長拉莫斯，今仗將戴上面具復出，配合華拉尼扼守防線有信心，銀河艦隊攻守佔優兼班拿貝地利，仍可望睇好爭勝以洗頹風。

馬拉加拒絕先降
馬拉加現時僅得七分排尾三，急需搶分護級，惜近況差勁，近五場得兩勝三負士氣低沉。論人腳實力，馬拉加與皇馬冇得比，前線路蘭、巴斯頓表現麻麻，門將羅拔圖、保羅巴斯及靴南迪斯把關防線，十二場失掉二十球漏洞多；馬拉加開季至今客場更悉數全敗，作客班拿貝一分亦難搶，恐成皇馬爭勝洗頹的犧牲品。

馬拉加後衛靴南迪斯拒絕未戰先降：“作客皇馬不容易，但馬拉加贏波又有何不可？所有比賽機會都是均等，對戰雙方都同樣有爭取三分的機會，我們知道相比起皇馬，今仗三分與我們的距離或者比較遠，但我們不會輕易放棄，馬拉加會集中精神做好自己本份，帶着自信作客班拿貝力爭最好表現。”

馬體勝望唱入雲
馬體會作客利雲特力爭聯賽重回勝軌。床單兵歐冠生死戰贏波，加上射手基斯文以一個金球破入球荒，大振球隊士氣，連同加美路法籍雙鋒攻堅，配合托里斯、哥利亞等人，馬體會牌面高一班，遇上主場三戰不勝的利雲特，床單兵有望睇好搶得三分。