鎚仔幫難擋車

    英超“一哥”車路士明晨繼續展開奪冠之旅，倫敦打吡戰作客韋斯咸。

    車仔目前遙遙領先次席的熱刺十分，可以話大把本錢在手，且餘下賽程相當有利，只剩曼市雙雄最具威脅。當然，以“車長”干地在意甲教祖雲達斯一向風格，都係小心駛得萬年船，絕對唔會鬆懈，今仗對住“鎚仔幫”，車仔必會繼續踩油衝刺。

    韋斯咸其實本身人腳唔差，惜整體發揮太過飄忽，表現時好時壞。上季曾經成為強隊剋星，幾支豪門勁旅遇上“鎚仔幫”都幾頭疼，但今季完全變質，變成欺善怕惡，對住強隊有輸冇贏。球隊目前排第十一位，高不成低不就，亦冇任何目標去爭，球員爭勝決心有限，無謂要阻“車”上路。初盤車路士讓半球／一球，捧車仔一球小勝格。

    車仔近兩場作客都係和波收場，踢作客始終比較難踢。不過，今場話晒都係同市，主客其實分別唔大。且車仔在倫敦球會中都係“一哥”地位，“鎚仔幫”始終低一格，車仔有望今季雙殺對手。

    推介：車路士1:0