韋斯咸打爆“基”

    美洲金盃賽今日休戰，西邊戰事祇有歐霸盃外圍賽“孭飛”，但大部分都係冷門球會，講球隊名，你都唔知喺邊。唯有揀場韋斯咸對拜基卡拉，起碼都有支大家熟悉嘅英超球會。

    至於拜基卡拉係來自只得三十幾萬人口嘅馬耳他，足球水平與英超相比至少差幾班，基本上韋斯咸半力出擊仍夠殺有餘，只睇吓可以贏到幾多球而已。

    韋斯咸今季都算大手筆，首先搵咗前克羅地亞國腳比歷做教頭，跟住又簽咗意大利國腳奧邦拿及法國國腳皮耶特，加埋原本班底，足以在英超立足，呢幾場歐霸盃亦可當作季前熱身。第一輪外圍賽兩回合輕取安道爾球隊路施坦斯四比○，球隊已操起狀態，今仗首回合在主場預料應可大炒對手。

    馬耳他國內甲組聯賽只得六支球隊，拜基卡拉係上季聯賽亞軍，陣中最知名者係前意大利國腳米哥利，呢位卅六歲老將在馬耳他聯賽可以做“大爺”；仲有阿根廷外援馬薩迪及塞爾維亞嘅胡簡拿治。拜基卡拉就係靠呢三位“老”大哥撐起成隊波，試問又點夠英超球會撼。

    推介：韋斯咸4:0