美國主場賴“地”硬

    美洲金盃賽主辦國之一美國，首戰只能以二比一僅勝洪都拉斯，可能在分組賽出線信心爆棚，所以有些少輕敵感覺，整體發揮並未去到最佳水準。或者教頭“奇哥”在分組賽先小試牛刀，留力淘汰賽階段。明早對住海地，美國明顯高對手一班，要攞三分易如反掌，但能否殺對手個片甲不留，就要睇球員作戰心態。

    海地上仗對住上屆亞軍巴拿馬，憑球員無比戰意最終逼和巴拿馬。值得一讚係球員比賽心理素質，完全未驚過對手，全場與巴拿馬鬥攻鬥搶。雖然今場對住強大嘅美國戰隊，海地只要繼續踢出鬥心，未至於會大敗收場。初盤美國讓兩球／兩球半，博鬥志可嘉嘅海地可以贏盤。

    美國對洪都拉斯的確踢得比預期差，場上形勢並未佔到任何優勢，射門次數亦少於對手，只係贏在丹普西兩次埋門機會，今仗如未能踢出較佳水準，贏波輸盤在所難免。

    海地陣中亦有部分外流球員，包括曾效力巴黎聖日門嘅梅里斯，仲有古列亞路、艾辛拿特及路易士等都在歐洲聯賽搵食，點都可以頂得兩咀。

    推介：美國2:1