智利挾兇取“墨”

    美洲國家盃東道主智利首戰取得開門紅，以兩球輕取厄瓜多爾，為出線打下強心針，只要明晨對墨西哥再下一城，八強位置就可坐定粒六。南美球隊一向主場氣勢十足，今仗對住屬於“過客”嘅墨西哥，一於殺無赦。

    雖然墨西哥在中北美洲敢認第二，美國亦未必敢認第一，但始終猛虎不及地頭蟲，作客去到南美洲同人爭“地盤”，除非真係好有料，實力又較對手強，否則都幾難發圍變做過江龍。初盤智利讓一球，兩隊近五次交手，各勝兩場可謂勢均力敵，但墨西哥首次到智利出戰，形勢極不利，睇好智利可以打發對手。

    身為今屆美洲盃主辦國，智利當然雄心勃勃，必然以最強人腳出擊，陣中擁有十六名外流球員，包括山齊士、維達爾、華加斯、米度爾及巴塞門將巴禾，除主場之利外，平均戰力亦在墨西哥之上，贏波絕對合理。

    墨西哥前線只靠馬體會嘅占美尼斯單打獨鬥，球隊的確勢單力薄，首戰只能悶和玻利維亞，叻極有限。

    推介：智利2:0