巴西難言穩勝

    美洲盃C組明晨上演重頭戲，兩支奪標熱門分子巴西與哥倫比亞將會正面交鋒。自世界盃後，鄧加接手“森巴兵團”，踢咗十場友誼賽，十戰全勝，所以今屆美洲盃的確令球迷充滿期待。

    但睇返首戰險勝秘魯，巴西似乎仍然欠缺應有霸氣，相信原因係鄧加放棄多名具經驗兼有質素球員，包括馬些路、丹迪、邁干、拉美利斯、奧斯卡、古斯泰禾及侯克等，只留低大衛雷斯、韋利安、泰亞高施華及尼馬等幾名世界盃主力。而且球隊好明顯依然太過依賴尼馬為核心，尼馬表現好壞足以影響整隊發揮。

    哥倫比亞第一場出師不利，竟然爆冷一球不敵委內瑞拉，要殺入八強，今戰絕對不能再輸，誓必與巴西展開埋身肉搏。論人腳，哥倫比亞係歷年來最強，特別係攻擊力，除法卡奧與洛迪古斯外，仲有波爾圖射手馬天尼斯及今屆歐冠盃神射手巴卡，計前線火力比巴西有過之而無不及，只要球隊能夠發揮出本身水準，根本未驚過巴西。初盤巴西讓半球，必捧哥倫比亞坐和望贏。

    推介：哥倫比亞2:1