兵工廠開大“素”
李斯特城與曼城在聖誕大戰中激戰成和,阿仙奴就擊敗般尼茅夫,乘勢升上榜首,可以話係雲格最佳聖誕禮物。但要坐穩“一哥”位置,嚟緊幾場大戰,兵工廠還要受到極大考驗。
首先今輪聯賽必須要順順利利,對住攻力疲弱、防守漏洞百出嘅紐卡素,阿仙奴呢三分應該“依絲執”,只係贏多贏少問題。紐卡素之前曾擊敗利物浦與熱刺,以為球隊勁反彈,可惜原來只係迴光返照,近三戰一和兩負,再次跌返落尾三,士氣又再低沉,今戰作客阿仙奴恐怕凶多吉少。初盤阿仙奴讓球半,兵工廠料可輕鬆拆“紐”。早前○比四慘敗畀修咸頓之後,兵工廠痛定思痛,上場對般尼茅夫踢出爭勝決心,憑住狀態大勇嘅奧斯爾一傳一射,帶領球隊全取三分,乘勝追擊,誓將紐卡素五馬分屍。
紐卡素整體戰力已經不足,目前更傷兵一大堆,包括泰萊、奧拔頓、施斯及正選門將添古爾等主力,令前中後三線實力更加削弱。另外,近八次對住阿仙奴,“紐記”輸足八場,真係碰到阿仙奴都腳軟。
推介:阿仙奴4:0